آخر الأخبار
سيدي يحيى بريس ترحب بكم ...
الرئيسيـــــــــــــــــــة فيديوهات سيدي يحيى بريس نحن دائمـــــــــا معكم إتصل بنـــــــا
قصيدة زجلية تحت عنوان "الضحـــى والعمـــران" ~ سيدي يحيى بريس

قصيدة زجلية تحت عنوان "الضحـــى والعمـــران"


قصيدة زجلية تحت عنوان "الضحى والعمران" لزجال الغرب المقتدر حسن البرارحي

حسن البرارحي دجنبر 2014


كان عندي شحال من فدان وفدان
السكنى واسعة كبيرة
مزينها جنان الخوخ والرمان
البير ماه صافي يروي العطشان
ف الصيف الجلسة نزاهة مع الجيران
القمر ضاوي مزين لمكان
نتسارى بين لقسيل ناشط فرحان
المنظر زين الطبيعة خضرا
تشوف النوار حلاللة وبلعمان
تسمع صوت الطيور السمان وبوردان
الرحاونة بالفلاحة معروفة من زمان
اليوم هجمت علينا الضحى والعمران
هاجوا علينا كيف الطوفان
الاراضي السلالية رجعوها سكن
ارضي ودواري اللي والفتو ف خبر كان
اختلت الطبيعة نشفوا الويدان
تامروا علينا زاحمونا ف السكن
مشى لاباز كملوها ب غابة لمريكان
ضيقونا لغريب معانا جيران
مشات ارض وكسيبة ورثنا لحزان
زمان واش من زمان
اللي كلفناه باع الارض العمران
حقنا راح عيان بيان
50 كتار سكن وسبيطار
حلمنا تبخر وطار
بقينا عايشين ف لقوار
القهرة والزلط راس مالي حمار
همشونا تخرب الدوار
كملوها وجملوها بالاحتقار
انت يا لمزغوب سباب الذل
كلشي منك هرب وجفل
حصدتي خيرنا كيف المنجل
بعنا البكرة وكملنا ب العجل
انت ضمنتي المسقبل
درتي الغيطة والطبل
حنا هلكنا الفقر والقمل
اليوم نحاسبوك على ارضنا
ماعندك فين تهرب ولا تسل
مصيرك الحبس وديرو على بابك قفل.

بحث في الجريدة الإلكترونية

التعليقات لا تعبر عن رأي الجريدة بل تلزم أصحابها فقط