آخر الأخبار
سيدي يحيى بريس ترحب بكم ...
الرئيسيـــــــــــــــــــة فيديوهات سيدي يحيى بريس نحن دائمـــــــــا معكم إتصل بنـــــــا
قصيدة زجلية تحت عنوان "سيدي سليمان" لزجال الغرب المقتدر حسن البرارحي ~ سيدي يحيى بريس

قصيدة زجلية تحت عنوان "سيدي سليمان" لزجال الغرب المقتدر حسن البرارحي


قصيدة زجلية تحت عنوان "سيدي سليمان" لزجال الغرب المقتدر حسن البرارحي

حسن البرارحي يونيو 2015


سيدي سليمان

اليوم بغيت نكتب قصيدة
على مدينة ساكنة ف القلب
سيدي سليمان مولوعة
ب الهيت والغيوان
شحال اعطات من فنان
الشرقي ولد امو راحل الليل غربو نجومو
الملاس يغني ب احساس
احمد القمش ب الهم ماتحس
ادريس الزيطي كان مازال يعطي
مليكة كانت ف الكروب شريكة
صوتها يركبك لهبال
تشطح لغزال بين لجبال
ولد البولانجي شحال قدني نحكي
الله يرحم داك الزمان ضاع شحال من فنان
سيدي سليمان تاج الشعبي يا لخوان
فيها الرمى هل لكلام الرباعي ولحكمة
ولد السقال كلامو مايبسال
الشيخ الحسين رجل رزين
الزواكة مول السكيتشات يضحك لولاد مع لبنات
كان لاباز لمريكان كلشي فرحان
اليوم سيدي سليمان بكات
خربوها اللوبيات الفلاحة مشات
هل الشر سدوا وزين الشمندر
خربوا جرادي الليمون بان العربون
سيدي سليمان بلاد العز والرجال
الحكمة ناسها عقال
المني زينها دبال خربها بوزبال
باعوا شرفها ب المال
باعوها الغدارة الصوت ل مول الشكارة
من حكرة الشفارة بانت الشرارة
بني حسن بنادم بكا وحزن
ضاعت الكرامة الحسناوي لابس كفن
ذبحوه من لودن لودن
تشلت الحركة السكنى ف البراكة
ف الشارع لوسخ ولعفن
الفقير يعاني من الصدمة
لاخدمة لا ردمة
ب دهن السير يسير
ضاع حق المسكين والفقير
بقا الله كريم عايش ع الحصير
شكون يخدم ل بلاد
لابنية تحتية لا اقتصاد
حق السلاليين علاش يضيع
استغلوها ب المقالع
الغابة سرقوها الكمارة والحطابة
الذيب قاضي لابس الجلابة
حسبوه من الصحابة
شعار المنافقين لامذهب لا دين
لي سولتيه جوابو على طرف لسانو
الله يخلينا غابة الناس حطابة.......

بحث في الجريدة الإلكترونية

التعليقات لا تعبر عن رأي الجريدة بل تلزم أصحابها فقط